अळबू ने पाबू चडिया, रामदेव ओ वीरा

बावन भेरू चौषठ जोगणी
और हनुमत करी ललकार
कमर कतारों, भलो हाथ में
बाबो आप लीले अस्वार
अरे बाबा आप होया अस्वार

अळबू ने पाबू चडिया, रामदेव ओ वीरा
पूगा पुंगळ बगीचे रे म्हायं, ओ अजमल जी रा कँवरा
पूगा पुंगळ बगीचे म्हायं

अळबू पाबू ने चडिया, रामदेव ओ वीरा
पूगा पुंगळ बगीचे रे म्हायं, ओ अजमलजी रा कँवरा
पूगा पुंगळ बगीचे म्हायं

अरे हरियो कर दीनो सूखे, बाग़ ने ओ बाबा
दीनो बाबे संख बजाय, ओ मेणांदे रा लाला
पत्ते पत्ते वाणी ओ सुणाय, ओ सुगणा रा वीरा
डाळे डाळे करी झणकार

अरे हरियो कर दीनो सूखे, बाग़ ने ओ बाबा
दीयो बाबो संख बजाय, ओ मेणांदे रा लाला
पत्ते पत्ते वाणी ओ सुणाय, ओ सुगणा रा वीरा
डाळी डाळी करी झणकार

अरे पुंगळ रे गढ़ सुं तोपां, छोड़ी पडिहार सारा
कियो बाबे चमत्कार, ओ अजमलजी रा कँवरा
कियो कियो बाबे चमत्कार

अरे पुंगळ रे गढ़ सुं तोपां, छोड़ी पडिहार सारा
कियो बाबे चमत्कार, ओ अजमलजी रा कँवरा
कियो कियो बाबो चमत्कार

अरे आग लगाई ओ किल्ला कोट में ओ बाबा
तोपों रा मुन्डा रे फेराय, ओ मेणांदे रा लाला
रत्ने री दिनी कैद छुड़ाय, ओ सुगणा रा वीरा
दर्शन दिया मालण ने आय

अरे आग लगाई ओ किल्ला कोट में ओ बाबा
तोपों रा मुन्डा रे घुमाय, ओ मेणांदे रा लाला
रत्ने री कैद छुड़ाय, ओ सुगणा रा वीरा
दर्शन दिया मालण ने आय

अरे आज तो वहु थाने, सासू कर जाणु म्हें तो
करजो वीरोसा ने जाय, ओ वहुवर म्हारी
बळतोड़ी आग बूजाय

आज तो वहु थाने, सासू कर जाणु म्हें तो
करजो थारा वीरोसा ने जाय, ओ भंवर म्हारी
बळतोड़ी आग बूजाय

विणती करी ओ सुगणा, अरज सुणी ओ वीरा
बाबो दीनी आग बुजाय, ओ अजमलजी रा कँवरा
भाणु, रत्ना ने बेन रे लाय, ओ सुगणा रा वीरा
जान चडाई रुनिचे जाय

विणती करी ओ सुगणा, अरज सुणी ओ वीरा
बाबो दीनी आग बुजाय, ओ अजमलजी रा कँवरा
भाणु, सुगणा रत्ना ने लाय, ओ सुगणा रा वीरा
जान चडाई रुनिचे जाय

लांछा सुगणा करे आरती ओ बाबा
माळी छंवर जश गाय, ओ अजमलजी रा कँवरा
माळी छंवर जश गाय

अरे लांछा सुगणा करे आरती ओ बाबा
माळी छंवर जश गाय, ओ अजमलजी रा कँवरा
माळी छंवर जश गाय

शरणे आयाने सोरा, राखजो ओ बाबा
रमता रुनिचे में आय, ओ मेणांदे रा लाला
रुनिचो ई सवायो धाम, ओ सुगणा रा वीरा
चुन्दडी ओढाई दोय चार

शरणे आयाने सोरा, राखजो ओ बाबा
रमता रुनिचे में आय, ओ मेणांदे रा लाला
रुनिचो सवायो धाम, ओ सुगणा रा वीरा
चुन्दडी ओढाई दोय ने चार

झुरे झरोखे सुगणा, सासरे ओ वीरा
नैणा माहीं बरसे बाई रे नीर, ओ सुगणा रा वीरा
कुण रे बंधावे बाई ने धीर

अरे खम्मा खम्मा ओ बाबा
राम रुनिचे रा राजा
आवो आवो सुगणा बाई री बेल, ओ अजमलजी रा कँवरा
आवो आवो सुगणा बाई री बेल