મેરુ તો ડગે પણ જેનાં મન ના ડગે

મેરુ તો ડગે પણ જેનાં મન ના ડગે રે પાનબાઈ
ભલે ભાંગી પડે રે બ્રહ્માંડ રે
વિપત્તિ પડે તોય વણસે નહીં
સોઈ હરિજનનાં પ્રમાણ રે

ચિત્તની વૃતિ જેની સદાય નિરમળ પાનબાઈ
ને કોઈની નહિ કરે આશ રે
દાન દેવે પણ રહે અજાસી
રાખે વચનમાં વિશ્વાસ રે

મેરુ તો ડગે પણ જેનાં મન ના ડગે રે પાનબાઈ
ભલે ભાંગી પડે રે બ્રહ્માંડ રે

હરખ ને શોકની આવે નહી હેડકી પાનબાઈ
આઠ પહોર રહે આનંદી રે
નિત્ય રે નાચે સત્સંગમાં ને
તોડે માયા કેરા ફંદ રે

મેરુ તો ડગે પણ જેનાં મન ના ડગે રે પાનબાઈ
ભલે ભાંગી પડે રે બ્રહ્માંડ રે

તન મન ધન જેણે પ્રભુને સમર્પ્યાં રે પાનબાઈ
તે નામ નિજારી નર ને નાર રે
એકાંતે બેસીને આરાધના માંડે તો
અલખ પધારે એને દ્વાર રે

મેરુ તો ડગે પણ જેનાં મન ના ડગે રે પાનબાઈ
ભલે ભાંગી પડે રે બ્રહ્માંડ રે

સતગુરુ વચનમાં શૂરા થઈ ચાલે,
શીશ તો કર્યાં કુરબાન રે
સંકલ્પ વિકલ્પ એકે નહિ ઉરમાં,
જેણે મેલ્યાં અંતરનાં માન રે

મેરુ તો ડગે પણ જેનાં મન ના ડગે રે પાનબાઈ
ભલે ભાંગી પડે રે બ્રહ્માંડ રે

સંગત કરો તો તમે એવાની કરજો,
જે ભજનમાં રહે ભરપુર રે
ગંગા સતી એમ બોલિયાં
જેને નેણ તે વરસે ઝાઝાં નૂર  રે

મેરુ તો ડગે પણ જેનાં મન ના ડગે રે પાનબાઈ
ભલે ભાંગી પડે રે બ્રહ્માંડ રે

                               --ગંગાસતી